سيد محمد حسين بهجت تبريزي « شهريار » ايرانين ملي شاعري و شرق عالمينين افتخاري 1285 بير آيري روايته گوره 1283 هجري شمسي ايلينده تبريز شهرينده بير عاليم خانواده ده دنيايا گوز آچدي .

اوستادين آنادان اولماسي ، ايراندا مشروطه حركاتي ايله، مصادف ايدي .

او حركت لرين كانونو تبريز شهري اولدوغو اوچون ، استادين آتاسي مير آقا خشكنابي كي تبريز شهرينده وكالت خاناسي واريدي . اوزده او جريانلارين مهم آدام لاريندان سايليردي اوناخاطير كي بوتون واختيني مشروطه انقلابينين خدمتينده اولسون ، بو قراره گلدي كي عائله سيني اؤز دوغما يوردو ، خشكنابا يولاسين.

او سببدن استاد خشكناب كندينه گئديب و ائله او يئرده كيچيك ياشلي سيد محمد حسين شهريارين ادبي فرهنگي  خزينه سينين تمل داشلاري قويولدو و گئت گئده ، اونون بيزه هديه وئرديگي آنا ديلنده شعرلري ، توركو ديلينده شرف قازاندي .

استاد تبريزه دونن دن سونرا اوز قريحه سين شعر ساحه سينده آتاسي مير آقا خشكنابي قوردغو ادبي اوجاق لاردا بيلينديردي بو يولدا هاميلارين تحسين و حيرتين و تشويقين قازاندي .

دئيرلره گؤره كيچيك ياشلي محمد حسين هر زمان شعر اوخويارميش اونون سلامت ليگينه اوزرليك يانديرارمشلار  . استاد شهريارين دئديگينه گوره ، اونون ايلك شعرلري آنا ديلينده اولموش . نييه كي او زامانلار درس اوخوما آنا ديلينده اولورموش.

- اورنك اولاراق ، آنا ديلي كتابلاري ايدي كي آقاي حسن رشديه طرفيندن تدريس اولونوردو . -

استاد شهريار اوز روان طبعيني شعر ساحه سينده عالمه بيلديره ندن سونرا ، ايرانيميزين بير سيرا مخصوص شرايطيندن آسيلي اولاراق پارسي ديلينده ده شعر دئمه گه باشلاميشدي.

ائله بو ساحه ده ده بوتون پارسي ديلي شاعيرلردن گوجلو گؤروندو. بو زمينه ده ، نيما يوشيج ، بيله سويله يير:« بايد بگويم شهريار تنها شاعري است كه من مي شناسم ».

دئمه لي يم:( ايراندا من بير شاعر تانييرام اودا شهرياردير)

هابئله استاد ملك شعراي بهار، استادين تعريفنده يازير: ((شهريار يالنيز ايرانين افتخاردي دئييل. بلكه او شرق عالمينين افتخاردي دير«. بو يولدا ايرانين بويوك يازيچي سيد جمالزاده دئيير :«شهريار آخرين پاسدار شعر پارسي است » .

استادين ياخين دوستو و آذربايجانميزين افتخاري ، استاد يدالله مفتون اميني بويورور:

«او  ميخانانين سونونجو پادشاهي ايدي ». تقريبا معاصر دورده اكثر پارس شاعري ،استادي تاييد و تحسين ائله يب لر. موسوي گرمارودي شهريار را حافظ زمان و دكتر عليزاده شهريار را نقطه عطف زبان پارسي  مي داند .

ها بئله  بيربويوك استاد سويله يير : پارس شعري شهرياري الده ن وئرمه سي ايله ، پارس شعرينين  سلسله سي  منقرض اولدو.

بو سوزلرين رغمينه استاد شهريار اوز آنا ديلينده شعر دئمه سي ايله ، تازادان ، تورك ديلينين دامارلارينايئني قان وئردي.  او بيلديردي كي بير آرخا ، سو گلميش اولسا اميدوار يئنه گلسين.  طاغوت دورونده عقله گلمه ين بلالار بيزيم ديلين باشينا گلدي.

او ديلده  يازيلان كتابلارا اوت ويريلدي،آنا ديلينده دانيشانلاردان مدرسه لرده جريمه لر آليندي. آمما بيزيم شعورلو روشن فكرلريميز ساكت قالماديلار : استاد شهرياربو زمينه ده بويورور:

توركونون جانيني آلميشدي حياسيز طاغوت

من حياط آلديم اونا ، حق اوچون احياء ايلديم

استاد شهريار پارس ديلنده  شعر يازماغا باشلامادان اؤنجه سوي آديندان فايدالانيب و  زمانين  مصطلح تخلص لري كيمي اوزو  اوچون «بهجت» تخلوصونو سئچدي اورنك اولاراق

آشاغادا گلن شعركي اوستاد شهريارا منتسب دير و من او شعري استاد شهريارين ياخين و قديم دوست لاريندان اولان رحمت ليك غلام اعدادي (غلام قصاب) جنابلاريندان آلميشام سيزلره نقل ايله ييرم. نئجه كي بيلرسيز گئچميش زامانلاردا اورجلوق اياميندا ، افطارا ياخين تبريز شهرينده ياغلي كوكه ساتارميش لار و اوجاسسي ايله چاغرارميشلار:

دوه لرقاتار قاتار ، گل بالاوين دوه سين آپار .

«گل ياغلي دان آزقالدي ، گل ياغلي دان آزقالدي»  ،

استاد شهريار ايله بوشعردن تاثير آلاراق آشاغيدا گلن شعري سويله يب دير:

يارب نيه خلق ائتدين بو قدر موسلماني

جنس بشره نسبت بير غول بياباني

ترياكي و مشروبي ،سيگاري و قلياني

ترجيح وئره ن دينه سر سامي وهذياني

آي دولما بادنجاني آي دولما بادنجاني

همسايه اولوب گئتدي بير كهنه پالاز قالدي

بدبخت عمي  نين گويا اوندا پايي آز قالدي

پاريس ده كي لر تئللي ،  تبريز ده كي داز قالدي

« بهجت» نيه ايرانين احوالي ناساز قالدي

گل ياغلي دان آز قالدي  - گل ياغلي دان آز قالدي

آمما سونرالار  استاد تهراندا طب ريشته سينده تحصيل آلاركن  بو قرارا گلدي كي اوز و اوچون بير اويغون تخلص سئچسين ايله او اوزدن ، اؤز مرشدي اولان حافظ و اونون ديوانينا ال اوزاتدي . استاد بو قرارا گلدي كي حافظين ديوانيندان بير فال دوتوب و اورادا گلن واژه ني اوزنه تخلوص قبول ايله سين . اوندا بو شعر گلدي .

دوام عمر و ملك او بخواه از لطف حق، اي دل

كه چرخ اين سكه دولت به نام شهرياران زد.

او زمان استاد شهريار  او تخلوصو اوزونه بويوك بيليب، بير دفعه ده تخلوص سئچمه ده بويوك حافظدن يارديم ايسته دي ، اوندا ، حافظين ديوانيدان بو شعر استادا تخلوص سئچيلدي ...

«روم به شهر خود و شهريار خود باشم .»

بو دفعه شهريارين دئديگينه گوره حافظ استادين تخلوصونون ((شهريار)) اولماغينا تاكيد ائله يب ، حتي اونو تشويق  ائله دي كي قايتسين  اوز شهرينه و اورادا اوزو ايچون شهريار اولسون . بئله ليك له  سيد محمد حسين بهجت تبريزي ((شهريار)) تخلوصونو سئچدي او پارس ديلينده بير قلله قالمادي كي فتح ائيله مه سين. ائله بواوزدن اونا حافظ ثاني لقبي وئريلدي.

استاد شهريار بير مجليسده كي من و فريدون حاصارلي و رضا حاصارلي واريدي بئله  سويله دي : من ايندي حافظ ايله بير كلاسدا وبيرمقامدايام.

فقط بير فرقيميز واركي من اوندان 600 - 700 يوز ايل سونرا دنيايا گلميشم،  اونا گوره اوندان سونرا كي معلومات كي دنيادا يارانيب منيم اونلاردا آز چوخ اشرافيم وار و... خاطيرلاديق كي استاد شهريار پارس ديلينين مختلف قاليب لاريندا اوز قدريتيني هامي نين گوزونه چكدي او حتي شعر نو ساحه سينده كي اونون همشهريلري مثال اولاراق  تقي رفعت و جعفرخامنه اي و حبيب ساحر و باشقالاري تبريزده باشلاميشديلار و او زامان تهراندا ياشايان پارس ديللي  اوستادلار بو نوع شعر دئمه گي بگنمه ييب و تقي رفعت و اونون دوام چي لاري ني انتقاد ائله يير ديلر . استاد شهريار تقي رفعتين دامچيسي اولاراق  «اي واي مادرم» منظومه سين پارس ديلينده و «سهنديه »شعريني تورك ديلينده سويله دي.البته ده يئرمي ايل تقي رفعت دن سونرا ، نيما يوشيج آستارا شهرينده بو سبك ده تقي رفعت ين دا و چي سي اولاراق شعر دئمه گه باشلادي. بوزامان مقرض  آداملار اوندان اونا گوره كي شعر نو دئمه گي  آذربايجانلي لارا نسبت وئرمه سينلر ، رحمت ليق نيما يوشيجه پدر شعر نو لقبي وئرديلر.  بيزجه نيما يوشيج پدرشعر نو يوخ بلكه پدر خوانده  شعر نودور ويا پارسي شاعرلرين ايچينده پدر شعر نوسايلابيلر. آنجاق يئنه يئري گلنده بو زمينه ده آراشديرماغا باشلاياجايق.

بو مقاله ده بيزيم تاكيديميز استاد شهريارين توركو شعرلرينين  موردينده اولاجاق.

بئله نظره : گلير كي استاد شهريارين توركو ديواني اونون توركو ديلينده دئييلن شعرلرينين هاميسي دگيل دير. نيه كي  دئديك كي استاد شهريار اوز آنا ديلنده قاباقجيل شاعيرلرين دوام چي سي اولاراق  كيچك ياشلاريندان باشلاياراق آنا وطني آذربايجانين فرهنگ و فولكولورونون  لاپ بكر و ال دگيله ميش واژه لرينده آتا- بابا لاريندان قالان ادبي      خزينه سيندن بيزه قيمتلي  اينجي لر گتريبدير.  او اوز همشهرسي  تيكمه داشلي خسته قاسيمن دوام چي سي اولاراق ، آذربايجانين شفاهي خلق اديباتنان هر نه خاطيرلايردي   اونلارين جيرگيني ((حيدرباباسلام))  منظومه سي وآيري توركو شعرلرينده ، اوز بالالارينا ميراث بوراخدي.

«حيدر بابايا سلام» منظومه سي طاغوت دورونده اويدورما و آللاديجي «وحدت ملي» شعاري آلتيندا ايران تورك لرينين ديل و فرهنگ و مدنيتي تاپدالانان زمان ، استاد شهريارين توسطي ايله لاييق جه سينه ايران تورك لرينين دوشمن لرينه قارشي محكم جواب اولدو.  استاد شهريارين داليسي جا ، حيدربابا مكتبي ياراندي بو مكتب بير ايستي ائل اوجاقينا چئوريله رك  بوتون ملي ستم دن جانا گلن ملت چي لر  ، او هوادا ،  استاد شهريار ايله سس سسه وئريب ، ايران توركلرينين فرهنگي مرز لريني يئني دن محكم لندير ديلر ائله بو اوزدن بوتون دوست و دشمن بيلدي كي،  توركلر ايراندا يالقيز آذربايجاندا يوخ بلكه اكثر يت اولدوغو  حالدا  ايرانين هر گوشه سينده واردير لار.  او بيلديردي كي ايرانين هر هانسي بير گوشه سينده بو ديله دانيشان وارسا او را بيزيم فرهنگي مرزيميز سايلر.

استاد شهريارين داليسي جا تقريبا اكثر تورك شاعير لري بو سبك ده يازيب ياراتماغا همت گوسترديلر. بوتايين شاعرلرينه اوتايين شاعيرلري  وباشقا تورك ديللي توپراقلاردا  ياشايان شاعيرلر ده او ساياقدا ، حيدر بابا يا نظيره لر سويله ديلر.

مغني لر حيدر باباني ديل لر ازبري ائله ديلر.  ها بئله  نوحه و تعزيه لرده، نوحه خوان لار اونون شعرلريندن فايدالانديلار . «حيدربابا يا سلام» منظومه سي ايله گوجلو سويلنميشدي كي او منظومه  يه دئييلن نظيره لرين هاميسي اونون كولگه سينده قالدي .
حيدربابا منظومه سي  بير گون كوره سي كيميدير كي اوندان سورا پارليان بوتون ادبي اولدوزلار اوندان نور آليبلار .

دئديك كي استاد شهريار ايلك شعرلريني توركو ديلينده سويله ييب دير او اورتا ياشلاريندا حيدربابا منظومه سين سويله ييب. ها بئله استاد بو فاني دونيادان كوچن گونه قدر اؤز آنا ديلينه وفادار قاليب و بيزيم ادبي خزينه ميزه تايسيز اينجي لر باغيشلاميشدي .

ائله بو بخشش لرين قارشيليغيندا بوتون تورك ديللي خالقلار شهرياري اؤزلرينه ميللي شاعير بيلديلر .  او بير ي طرفدن استاد شهريار، ديل دشمنلرينين طرفيندن عاغلا گلمه ين بلالارا راست گلدي . شوونيست لر اونون ديلي و ديواني ايله دوشمني ايديلر . او اوزدن هر نه كلك وار ايدي ايشه سالديلار تا اونون يازديغي توركو ديواني ني نابود ائله سين لر .

بيزيم نظريميزجه استاد شهرياردان قالان توركو ديلده ديواني ، استادين تمام و كمال توركو شعرلرينين مصداقي دگيل .

بو شعرلر استادين او شعرلري دير كي ، استاد اوردا – بوردا بو شعرلري اونا – بونا هديه وئرميشدي ائله بو يول ايله استادين ايندي كي  اليميزده  اولان توركو شعرلري ديل دوشمن لرينين طرفيندن قورونوب ساخلاميشدير . استاد شهريار بويورور:

بير سلقه لي اوغرو تاپيلميش سا بو باشسيز يئرده

يئري وار شهريارداندا دولو ديوان آپارا .

بيزيم نظريميز جه استاد او بيريسي توركو شعرلريني قورويا بيلمه ييب و ديل دوشمنلرينين طرفيندن چالينميشلار.

باخين اوستاد بويورور :

توركو اولموش قدغن ديوانيميزدان دا خبر يوخ

شهريارين ديليده واي دئيه ديوانيله گئتدي

آما شهريارين اوغروسو چوخ سليقه لي و حساب اولموش اوغرودو،او بيلير كي نه سئچيب نه آپاراجاق .

به قول پارس شعري : چو دزدي با چراغ آيد گزيده تر برد كالا

آما شهريار بير رندي دير و رندانه او وضعي نشان وئريب و طاغوت دورونده كي خفقانليغي بوندان آرتيق گؤسترمك اولماز . استاد شهريارين توركو ديوانيني چالان مامور الينده حكم گتيريب حاكم زامان دان . استادا بيلديريب كي توركو ديلي قدغن . دير او اوزدن شهريارين ديواني ني دا ضبط اولونماليدير . علاجسيز شهريار بئله سويله يير :

وئررديك قديم ديوانا عرضه ، ايندي

كيمه عرضه وئرمك بو ديوان اليندن.

شهريار بو احوالاتي بير جورلوك ايله دوستلارينا چاتديرير و بيلديرير كي اونو اؤز ائوينده زينداني ايئله يبلر و گئجه گوندوز گؤز آلتيندادير .

شهريار بويورور :

ائويم زندانيم ماموروم اؤز ايچيمده

هارا قاچسين انسان بو زندان اليندن .

بئله بير حالدا بو سؤزلر اوستادين دوستلارينين قولاغينا چاتير آما دوست اليندن بير زاد گلمير نييه كي اودا داردادير اودا زنجيرلنيب بولود قارا چورلو بير شعرده استادا يازير :

دئييرلر ديلبريم بولور قصريده

داردادير آسيليب تپه ساچيندان

قارداشيم داردادير مني چاغيرير

شهرياربوينونا زنجير وورارلار

چئينه رم گميررم دارتيب آچارام

ايشله يير قولوما دمير پاخلالار

جان قارداش هله ليك باغيشلا مني .

دئيه سن اونوتدوم اسارتيمي

بيزجه ايراندا ياشايان بوتون توركلر فشار و خفقان اثرينده اكثراّ يازديقي اثرلري يا اؤزلري قورخودان يادا مستقيما دولت طرفيندن چالينيب دير .

دژخيم رژيم دونه – دونه  استاد شهريارين ايوينه باسقين ائدير و اونون بوتون توركو شعرلرين كيلراليندن چالير

يو زمينه ده شهريار باغيرير :

گئچن گئجه جين لر قوشون چكديلر

من قورخودان جينقيريغم چيخمادي

يورقان اوسته منه سيريق چكديلر

منده سيرتيق هئچ سيريغيم چيخمادي .

بو شعذرده استاد شهريار عالم آشكار دئيير كي : «گئچن گئجه دولت آژان لاري اونون ائوينه باسقين ائتديلر تا اونون گؤزونون اوتون آلسينلار . » .

آما استاد بو سؤزلرينن سارسيلان دئييل اونون رسالتي پيامي چاتديرماقدير: بوموردده بويورور:

صوبح خياليله خوروزلاندي كن

منده هوپ هوپ تك بير آغيز بانلاديم

اما نه يازيق كي اودا اسلافي كيمي بانلاماقين دادين آنلاييب چونكي دوشمن لري اونو اولمايان شكنجه لره معروض قويوبلار :

يئنه بويورور:

قالمادي سالم منه ده قول قاناد

بانلاماغين منده دادين آنلاديم .

بوندان آشكار او وضعيتي نئجه نشان ورماق اولار ؟ استاد قول قابيرقاسينين ازيلمه سيندن خبر وئرير . او بو وضعده يولداشلارين كومكه و دردلشمگه چاغيرير . آما بير كسدن خبر چيخمير :

جوجه لريم گلمه ديلر يانيما

آغريمي آلديم يانيما يانلاديم .

دقيقا استاد دئيير كي فشار و خفقان اثرينده هامي گئديب اؤز لاكينا و هئچ بير كسدن خبر يوخ به قول پارس شاعيري اخوان :

سلامت را نمي خواهند پاسخ گفت :

كه سرها در گريبان است

...

زمستان است ، زمستان است .

استاد شهرياردان اؤز دوغما بالالارينا تقريبا 1900 بيت شعر توركو ديلينده ميراث قاليبدي . بير حالدا كي صائب تبريزيدن حدودا 20000 بيت شعر توركو ديلينده زمانين          آفت لريندن جان قورتارميش . و بوگون توركو ديلينين ديرلي شعرلريندن سايلير .

بير آيري طرفدن باخاندا گؤرورك كي استاد شهريارين پارسي ديلينده يازيلان شعرلري  حدودا 100000 يوز مين  بيت دن آرتيق دير. بير حالدا كي استاد شهريارين اؤزو تصديق ائله ديگي اوچون اوْ دورد ، بئش ياشيندا اولاركن ، ايلك شعرلريني آنا ديلينده سويله ييب ، اورتا چاغلاريندا حيدربابا منظومه سين ياراديب و نئجه كي بيليرسيز استادين اليميزده اولان توركو شعرلرينين اكثري عومرونون آخير چاغلاريناعاييددير. بير آيري معنايا گؤره استاد عومرونون ايلك چاغلاريندان اوله نه قدر آنا ديلينه حورمت بسله ييب و او ديلده شعر يازيب دي .

ايندي بو سوال آرايا گلير كي « بير شاعير كي عومور بويو آنا ديلينه حرمت بسله ييب و او ديلي دونيانين ان گؤزل و سئويملي ديلي بيليب و گئجه گوندوز بو خزانه يه قيمتلي دورر دانه لري باغيشلاميشدي . نئجه اولا بيلر كي  فقط  مين دوققوز يوز بيت شعر دئسين ؟ او بويورور : توركو ديلي تك سئوگيلي ايستكلي ديل اولماز

باشقا ديله قاتسان بو اصيل ديل اصيل اولماز

بو شعرين سويله يه ني ، تماميله بير ميللي دويغولو روحيله اؤز ديليني منيمسه يير   ها بئله بويورور :

پارس شاعيري چوخ سؤزلريني بيزدن آپارميش

و يا :

توركون قوشونو قيصر رومي اسير ائتميش .

و...

استاد بو مرام ايله اؤز باخيشين و حرمتين آنا ديلينه آيدين – آشكار بلله نديرير بونلار. ايله استاد اؤز موضعيندن ال گؤتورمور . او دونه  ،دونه ،ايران مملكتيندن اولان خفقاني بيلديرير

دئيير كي بورا دا هر يئر گئجه رنگيله قاريشيب و سويوخ هر ياني بورويوب . داها تاب گتيرمك مومكون دئييل :

بو گئجه من كي ياتا بيلمه ييرم

باشي باشلارا چاتا بيلمه يرم

گئجه ميز صبح اولاجاق يا هله وار  ؟

باخيرام هئي ساعاتا بيلمه يرم .

البته ايراندا پارس ديللي شاعيرلرده بو احواللاتي بيزه آيدينلاديللار :

مثال اولاراق ، فروغ فرخزاد دئيير:

من از كجا مي آيم

كه اينچنين به بوي شب آغشته ام

ايمان بياوريم به آغاز فصل سرد.

ها بئله نيما يوشيج دئيير :

«گئجه دير باخ گئجه دير»

استاد شهريار بو اجتماعي سيخينتيدان عومور بويو ضرر گؤروب او تهراندا طب رشته سينده اوخوياركن : «الا تهراني يا انصاف مي كن » شعريني سويله ميشدير.

ائله او علته گؤره دانشگاهدان قوولدو. او دانشگاها قايتماسيندان اوترو چوخ آدامدان يارديم ايسته يير. او نيشابوردا ايرانين تبعيد اولموش نقاشي كمال المولك دن ده يارديم ايسته يير اوندا كمال الملك دئيير :

«كل اگر طبيب بودي سر خود دوا نمودي »

بيزيم نظريميز جه بو فيكير كي استاد بير قيزا عاشيق اولور و اونا گؤره دانشگاهدان قوولور دوز اولابيلمز. طاغوت دولتي استاد شهرياري آنا ديلي ، آذربايجانا حرمت بسله ديگي اوچون دانشگاهدان و طب رشته سيندن محروم ايله يير . استاد دولتين اليندن قاچار كن ، او شهرده ، بو شهر ده باش ساخلايير . آخيردا آناسي سايلان تبريز شهرينين قوجاغينا قايدير .

استاد دئيير :

تهرانين غيرتي يوخ شهرياري ساخلاماغا

قاچميشام تبريزه تا ياخشي – يامان بللنسين .

استاد شهريارين انقلاب دان سونرا يازديغي توركو شعرلرينين موردينده امكاني اولورسا و واختي گلديكجه آراشديريب يازاجاييق .